Aad, zeek en "miesselik"
Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich
Aad, zeek en "miesselik": drie wäörd die de meiste luuj neet gaer huueren of inne móndj nömmen, en veural al neet in combinaasje mitterein, mer helaas gèlje ze mer alste dök veure seniore inne verzorgingshoezer. Mer ouch boete de verzorgingshoezer zeen dees drie begrippe van toepassing. Op 't plattelandj van Limbörg zitte väöl aaj luuj, veurnamelik widdewe, einzaam te waarte toet häör lèste daag kómme. 'n Gooj inspanning zów zeen óm dees luuj häören tied die ze nag euverhöbben op te völle mit mieë plezeer en mieë gezelsjap. 'n Iniatief is daoróm ouch óngerwaeges inne Roerstreik, wo jóngere häör aje 'ns good verwinne.
Aad waere det doon v'r allemaol en 't ajer-waere bringk ouch väöl dinger mit zich mit die döks lestig zeen óm taengenop te kinne. Dien gansen ómgaeving verdwientj lankzaam óm dich haer eweg. Es kindj begintj dit proces eigelik al es dien (euver)groeatajers veuraan staon; op middelbare laeftied zeen dien ajers ane beurtj en oetèndelik dien laeftiedsgenaote wo se dich die gans laeven aan op höbs getróg. 't Liek esof d'r nemes mieër is wo se mit kins kallen en de vèls in e sociaal isolemèntj. 't Is meh good det de jóngere inne Roerstreik daoróm die aje get gezelsjap guuef, zwades ze neet depressief waere.
Des se zeek wuuers es se-n aad bös det sprèk ouch veur zich. Dien ligkheim begintj te verslieten enne reparaasjes doere get lenger. De middesiene vanne dokter wirken ouch nimmieë zoea good en inne haof wirken of 'ns grönjig baovenoppe keukekesjkes pótse zit 's neet mieë bie. 't Grótste gevolg van dit ónvermeuge óm get te kinne doon is det se nörges mieë kums dewiel se heim ouch nieks mieë te doon höbs. Ouch hie springe de jóngere inne Roerstreik weir bie óm die aje nag 'ns nao de kinjerbórderie te bringen of nao de kien- of bridgeaovendj.
Meh waat is det mit det misselik-waere? Wovan wuuerse misselik, of oppen ajen tóng "miesselik"? Väöl luuj waere misselik van häör ómgaeving enne modernisering. Alt mót taengewuuerdig meh mitte computer dewiel det stóm dink van geine maeter wirk en es se-n ouch allein mer oppe spaasje dröks vluug dich drek al de slaopstandj aan. Wiejer is de Kirk in de meiste plaatse neet mieë zoea vól wie zie vreuger waar. Ouchal vèltj 't mitte laegloup vanne Kirk inne Roerstreik nag mit, de daachelikse mès is d'r al jaore neet mieë. En waat den te dinke van 't extreem-polariseerdj en ónkristelik politiek klima? Ouch hie kinne de jóngere vanne Roerstreik weir 'n deens bewiezen aan die aje, went zie weiten alles euver computers, van wie weinig invlood de politiek feitelik haet en vanne Biebel (bluffe bringk ederein ouchal e wied stök troewes).
Aad, zeek en "miesselik"? In 't aad Amb Mofert enne drekte ómgaeving weite ze d'r waal raod mit.
Dit artikel besleit aad nuujs en maak deil oet van oos arsjief van nuujsberichte.