Aantal coronadoeje in Limburg opgeloupe toet 137, werkelik aantal besjmettinge gesjat op 20.000 toet 30.000
Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich
- Dit artikel sjteit gesjreve in 't AGL.
't Aantal luuj det in Limburg is gesjtorve aan 't coronavirus is dit weekend opgeloupe toet 137. Det zaet Christian Hoebe, infeksiearts vanne GGD Zuud-Limburg zóndigmiddig. De sjtieging is conform verwachting, maar neet mier exponentieel, zaet Hoebe. "'t Liekent t'rop det 't minder greuj gief es gevolg vanne maotregele." 't Werkelike sjtörfdeciefer ligk hoeger ómdet allein de sjtörfde van luuj van waem beweze is det ze door 't virus gesjtorve zien, bekind is gemaak.
De GGD inventariseert in euverlèk met hoesartse en specialiste ajeregenaeskónde inne pervincie wieväöl luuj zien gehiemeld vermeudelik es gevolg van 't virus. Hoebe verwach inne loup van kómmende week die ciefers bekind te kènne make. Limburg tèlt óngevier 1.200 besjmettinge, zaet Hoebe. Det is 'n "zjwaor óngersjatting" van 't totaal aantal luuj mèt 't coronavirus. De GGD verwach det tösse de 20.000 en 30.000 luuj in Limburg besjmet zien mèt 't virus. Ómdet inkel de patiënte in 't krankehoes en de hölpverlieners weure getes, gaeve de officieel aantalle gein adequaat beeld.
't Hoegtepunt vanne belasting vanne Intensive Care aafdeilinge in Nederlandj weurt kómmende week verwach, zag Diederik Gommers, veurzitter vanne Nederlandse Vereniging voor Intensive Care (NVIC) goonsdig inne Twiede Kamer. "V'r höbbe nog noets e landelik perbleem gehad van dizzen ómvank." 't Gief alderlei planne veur opsjale, maar bie "nog 'ne kier opsjale weurt 't sjpannend", zag Gommers.
'n Actueel beeld veur Limburg kós de veurzitter van 't Netwerk Acute Zorg Limburg (NAZL) zóndig aan 't ind vanne naomiddig aevel nog neet gaeve; dit kèn ouch verendere per oer. "Maar det de drök oppe IC-bèdde hoeg is in Limburg, is dutelik." 't Krankehoes van Mesjtreech (MUMC) zuut 'n algemein toename van coronapatiënte op zoewaal de IC es de anger aafdeilinge en verwach veurluipig nog sjtieging. Volges 'ne waordveurder van 't krankehoes geit 't nog, wiewaal hae aantalle neet wilt neume. 't MUMC verwach ind dees week de coronaverpleegaafdeiling in congrescentrum MECC vaerdig te höbbe. 't Geit óm 'n oetbreijing van 250 bèdde veur patiënte die neet in aanmerking kómme veur IC-zörg. 't Vèlt noneet in te sjatte of die extra capaciteit ouch ech gebroek zal weure, aldusse waordveurder.
In 't Laurentiuskrankehoes in Remunj ligke 41 coronapatiënte, van waem ach oppe IC. Dao is plaats veur maximaal elf patiënte, luuet 'ne waordveurder weite. Woe nudig weure patiënte opnuuj verdeild euver krankehoezer óm zoe de drök e bietje te sjpreide.
Brónne bewirk
Dit artikel besleit aad nuujs en maak deil oet van oos arsjief van nuujsberichte.