Alle sjnelwaeg euverdaag nao maximaal 100 kilomaeter per oer

Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich


Dit artikel sjteit gesjreve in 't AGL.

12 november 2019 - Op alle sjnelwaeg maag inne toekóms euverdaag neet mier 130 of 120 kilomaeter per oer waere gevare. Dae maatregel is volges ingewiede óngerdeil van 't sjtiksjtofplan det 't kabinet aafgeloupe goonsdig haet geprizzenteerd.

De sjnelheid op sjnelwaeg geit euveral ómlieg nao 100 kilomaeter per oer. Op waeg woe noe 'n maximumsjnelheid van 130 of 120 gèldj maag 't gaaspedaal allein tösse 19:00 en 06:00 oer toet die sjnelheid waere ingetrap. Dizze maatregel mót d'rveur zorge det minder sjtiksjtof weurt oetgesjtote en daodoor kènne sjtilgelagde boewprojekte op kórten termien waere vlotgetrokke.

De autobranchevereiniging Bovag dènk aevel det 't verliege vanne maximumsjnelheid op sjnelwaeg e beperk effek haet oppe wieväölheid sjtiksjtof dae terechkump inne natuur. "Al ierder is aangetuind gewaore det 't effek van sjnelheidsverlieging hiel klein es. V'r begriepe det alle maatregele, wie klein ze ouch zeen, hèlpe, mer v'r höbbe 't idee det 'n sjloopregeling veur de auto's die 't meis vervoele e groeter effek haet", aldusse waordveurder van Bovag. 'n Sjnelheidsverlieging leidt volges verkiersdeskóndige waal toet minder ernstige óngelökke, zjwaor letsel en files.

Op dit moment maag nog 130 waere gevare op de A2 tösse Buul en Werment, mer allein es de sjpitsjtroke neet aop zeen, van knouppunt Kaereshei bis knouppunt Kruusdonk en van aafsjlag Mesjtreech-Centrum-Zuud bis de Belsje grens. Op de A73 maag de sjnelheidsmaeter oploupe toet 130 tösse aafrit Lin en knouppunt 't Vondere. Die sjnelheid is ouch van toepassing oppe A67 tösse Zomere en knouppunt Zaarderheike. Oppe A76 geit 't óm 't sjtök tösse knouppunt Kunderberg en de grens mèt Pruses, woe me noe nog 130 kilomaeter per oer maag vare. Oppe A77 van knouppunt Riekevoort bis aan de grens mèt Pruses maag 't verkier 130 vare.

Oppe A79 is twie jaore truuk al de maximumsjnelheid van 120 nao 100 kilomaeter per oer truukgebrach gewaore vanwaege de verkiersveiligheid. Oppe A74 gèldj 'n maximumsjnelheid van 120 kilomaeter per oer.

Brónne bewirk



Dit artikel besleit aad nuujs en maak deil oet van oos arsjief van nuujsberichte.