Brute graafsjennis op nonnekèrkhof in Mestreech
Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich
Mestreech - 18 miert 2020, Vandaole höbbe 24 vaan de 99 graver gerampeneerd op e kèrkhof vaan nonne in 't Severepark in Amby. De sjaoj woort dinsdagmiddeg oontdèk. De 99 zwarte graafkruzer vaan de Zösters vaan Bermhertegheid stoonde ömmer good oonderhawwe in e heukske vaan 't Severepark, achter 'n hègk. 't Jongste graaf is vaan 2015, 't ajdste perceis 'n iew ierder. 't Beeld is noe hiel tristeg. Geetiezer graafkruzer zien aofgebroke en ligke her en der verspreid. De naome vaan de nonne, in sjoen witte lètters, ligke letterlek allemaol op de groond: wie zr. Gerarda, zr. Rosalie, zr. Christine. Mèt geweld is 't sloot vaan 't hèk kepot getrap gewaore.
't Park ligk ingeklemp tösse de wiek Amby en d'n otoweeg. Desiree Maas hojs daartien jaor in Kestiel Severe. "Iech bin groetgetrokke in Amby en späölde hei altied in de netuur", zeet Maas. "Noe haw 'ch 't park bij. Veur väöl awwere oet 't verpleeghoes De Zeve Bronne is dit de einsegste plek boe ze mèt hun rolstool nog in de netuur kinne koume."
Same mèt Marij Smeets is ze deze goonsdag bezeg de umgeving vaan de Mariagrot te sjoevenere, twiehoonderd meter vaan 't kèrkhof. Drie jaore trök rampeneerde vandaole de naogebouwde grot. Smeets: "V'r móste hel wèrke um 't Mariabeeld te herstèlle. Ouch alle persoeneleke herinneringe die lui dao hadde neergelag waore gerampeneerd." Noe obbenuits. Desiree Maas: "Dinsdag roond haaf vief belde e nisjeke: ' 't hèk vaan 't kèrkhof steit ope, 'ch geluif dat dao vertesteweerd is.' De geetiezer beelde kinne neet mie weure gerepareerd."
Mèt de graver is ouch e stökske historie verinneweerd. De Zösters vaan Bermhertegheid kaome in 1856 oet Luuk nao Mestreech en hadde ouch e kloester aon 't huidig Misericordeplein in de binnestad. In Amby kochde ze in 1912 landgood Severe veur hun voogdijstichting Sint Vincentius à Paolo. Ze stichde dao ouch 'n kapel, sjaol en noviciaat. In 1985 verlete ze Amby.
De Elisabeth Strouven Stichting is drök bezeg mèt de opknapbeurt vaan 't Severepark, meh 't kèrkhof is nog ummertouw vaan de congregatie, boevaan Jan van de Weerdt adviseur is. Heer zeet: "De hoofzöster, die 92 is, vint dit versjrikkelek. Iech höb häör persoenelek gezag dat veer de graver goon herstèlle. Op 't moment leve nog zès Belse en twie Nederlandse zösters. Die twie hope ouch dat ze in 't Severepark zalle weure begraove."
Nao 1985 kaome lui aanvankelek nog blomme bringe nao de graver. "Meh dat woort ummertouw minder", vertèlt Desiree Maas. "Sinds vief jaor zèt 'ch 99 waxineleechskes neer. Dan gief 't nog toch nog iemand die aon de zösters dink."
Brónne bewirk
Dit artikel besleit aad nuujs en maak deil oet van oos arsjief van nuujsberichte.