Coronaciefers: Limburg de groetste brandjhaard

Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich

Dit artikel sjteit gesjreve in 't AGL.

Limburg is de aafgeloupe waek de provincie mit rilletief de meiste coronabesjmettinge. Det kump veural door 't groete aantal besjmettinge in Noord- en Midde-Limburg.

Ten opzichte van 't inwoenertal versjpreid 't coronavirus zich in ós provincie 't hels mit 332,90 besjmettinge per 100.000 inwoeners. Det bliek oet ciefers van de GGD's en 't RIVM.

De versjille tösse noord en zuud blieve groet. 't Verzörgingsgebeed van GGD Limburg-Noord is de aafgeloupe waek zelfs de groetste brandjhaard van 't landj mit 419,41 besjmettinge per 100.000 inwoeners. In Zuud-Limburg ligk det ciefer väöl lieger mit 257,56 besjmettinge per 100.000 inwoeners.

Es v'r op gemeinteniveau kieke, zeen in Bezel nao verhajding de meiste luuj besjmet geraak: 585,92 per 100.000 inwoeners. Venlo (559,94), Roerdale (554,14) en Remunj (528,72) volge.

"V'r zeen det 't aantal teste toenump en det in waek 11 bis 13 ouch 't aantal besjmettinge in Noord- en Midde-Limburg oplöp," zaet Hans Buskus, waordveurder GGD Limburg-Noord. "'t Sjtieg al e tiedje. Det beteikent det v'r inne derde piek zitte." De GGD haet gein zich op woeróm 't aantal in Noord-Limburg hoeger ligk es in anger regio's. "'t Is lestig te óngerzeuke ómdet 't van zoeväöl faktore aafhingk. 't Is dök lestig precies te begriepe wat dao percies gebeurt." Net wie lanjelik zuut ouch hie de GGD det 't aantal jóngere det zich luuet teste toenump, net wie 't aantal positief getesde jóngvolwassene.

In totaal zeen de aafgeloupe zeve daag 3719 coronabesjmettinge vasgesjteld gewaore, woevan óngevier 2200 in Noord- en Midde-Limburg. In totaal zeen noe minstes 85.883 Limburgers positief getes op 't virus. 't Aantal provinciebewoeners det opgenaome is gewaes is gesjtege nao 2994. De aafgeloupe waek vele hie twelf doeje te betreure. 't Coronavirus haet noe mie es 1500 Limburgers 't laeve gekos.

Lanjelik gezeen is 't aantal vasgesjtelde coronabesjmettinge aafgeloupe waek mit 7 procent aafgenómme ten opzichte vanne waek daoveur. 't RIVM registreerde in zeve daag 48.186 positief tesrizzeltate. Bie 't gunstige ciefer mót weure aangeteikend det 10 procent minder teste woorte aafgenómme.

"Dees daling kump meugelik doordet minder luuj zich höbbe laote teste tiedes 't paosweekend," meld 't RIVM. "De kómmende daag zal dutelik weure of de daling in 't aantal positief tests door geit zette." De aafname waor 't hels ónger aaj luuj baove de 80 jaor (-15 procent) en ónger jóng luuj bis 18 jaor (-11 procent).

't Aantal nuuj coronagevalle sjteeg inne waek van 23 bis 30 miert nog mit 13 procent. Inne waeke daoveur noteerde 't RIVM 'n toename van 16 en 24 procent. De sjtiegende lien die hauverwaege fibberwarie woort ingezat, koom begin miert ouch aeve tot sjtilsjtandj en góng daonao toch weer ómhoeg.

Ane coronamaotregele is nieks verangerd. Wat waal gesjtaag vordert, is de vaccinatiecampagne. 't RIVM signaleerde al ierder det die dinkelik häör vröchte geit aafwèrpe bie ajere. Ouch 't aantal nuuj krankehoesopnames van luuj mit COVID-19 noom de aafgeloupe waek get aaf, mit 3 procent. Daovan goof 't in totaal 1588. Oppe IC's noom 't aantal opnames van ernstig kranke luuj zjuus hel toe, mit 19 procent. In totaal woorte 376 nuuj ic-opnames geregistreerd.

Volges beraekeninge van 't RIVM is 't reproductiegetal, det tuint wie hel 't virus zich versjpreid, get aafgenómme. 't Sjteit noe op 1,01. Det wil zègke det de situatie bauw sjtabiel is en hónderd besjmette luuj gemiddeld 101 anger aansjtaeke.

't RIVM registreerde 142 sjtörfgevalle. De waek daoveur goof 't 171.

Brónne bewirk

Dit artikel besleit aad nuujs en maak deil oet van oos arsjief van nuujsberichte.