Jaorwisseling in Limburg verlöp röstig

Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich


(lagerfoto)
Dit artikel sjteit gesjreve in 't AGL.

De jaorwisseling in Limburg is zónger groete incidente verloupe. De pelissie, brandjwaer en ambulancezörg sjpraeke van 'n röstige nach. Ouch inne krankehoezer waor 't opvallend röstiger es anger jaore, óndanks 't feit det 't kabinet 't aafsjtaeke van vuurwèrk in 't ganse landj haet verbaoje óm d'n drök oppe zörg te vermindere. De pelissie kreeg väöl mèldinge, mer kós gein ciefers gaeve euver eventueel boetes of aanhajinge. Nörges in Limburg zien, wie op anger plaatse in 't landj waal gebäörde, hölpverlieners door fiesveerders mit vuurwèrk begoejd of op 'n anger meneer lestiggevalle. Wiejer zien die nach gein groete illegaal fieste beëindig gewaore, in taegesjtelling tot aafgeloupe goonsdig. Doe goof 't e groet illegaal fies in e bedriefspandj in Tegele. Vief luuj woorte dao aangehaje, wie zie zich neet identificere kóste.

In Zuud-Limburg had de brandjwaer 't waal drökker es anger jaorwisselinge mit 't blösse van autobrenj. In Mesjtreech, Haelder, Bor en Landjgraaf gónge opgetèld zeve geparkeerde wages (gedeiltelik) in vlamme op. "Meistal höbbe v'r inne nuujjaorsnach waal ein of twie autobrendjes, mer noe goof 't opvallend mie", aldusse waordveurder Leon Eummelen. Ouch in Ittervoort mós inne nuujjaorsnach 'nen autobrandj weure geblös.

Wiejer mós me volges de brandjwaer Limburgbreid inkel teentalle kiere oetrökke veur klein brendjes in kóntaeners, drekbek en anger sjtraotmeubilair; dök 't gevolg van vuurwèrk. De brendjes leidde wiejer nörges tot probleme, zoe laote de bei Veiligheidsregio's weite.

De SEH's vanne vief Limburgse krankehoezer belaefde zónger oetzónjering 'n opvallend röstige nach. D'r mèldde zich koum of gein vuurwèrksjlachoffers. 't Insigste sjlachoffer woort in Mesjtreech behanjeld en had geinen ougsjaaj, aevel waal een lichte verwónjing aan zien handj. Ouch 't aantal luuj mit alcohol- of drugsgerelateerde probleme det hölp nudig had, waor väöl lieger es anger jaore. In VieCuri woorte twie fiesveerders behanjeld, in 't MUMC+ èlf, Zuyderland tèlde vief vergiftiginge en 't St. Jans Gashoes twie. 't Laurentiuskrankehoes in Remunj had gaar gein vuurwèrk- of alcoholpatiënte.

"Óndanks 't feit det neet edereine zich haet gehaje aan 't vuurwèrk- en samesjoelingsverbod, höbbe v'r hie oppe sjpoedeisende hölp de röstigste Silvesternach oets belaef. Veur ós höbbe de maotregele good gewèrk. V'r zeen dao gans content mit, want hejje 't mit corona éch neet ouch nog bie kènne höbbe", aldusse Zuyderlandwaordveurster Stef Petit.

Veuraaf had me angs veur 'n ónröstige Silvesternach en ingesjat det väöl luuj, nao e jaor mit corona-taegesjlaeg, sjneller kwaod weure. De pelissie had väöl extra luuj ingezat. Oetintelik is 't dus in eder geval mitgevalle. Euveriges verlöp de jaorwisseling in Limburg meistal röstiger es in anger deile van 't landj.

Brónne bewirk



Dit artikel besleit aad nuujs en maak deil oet van oos arsjief van nuujsberichte.