Litste koel in Duutsjlandj sluutj
Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich
MOFERT - 21 dieëtsember 2018 - De litste koel wo steinkaol wuuertj gewónnen in Duutsjlandj geit vandaag toe. Mitte sloeting van Prosper-Haniel in Bottrop kump 'n ènj aan mieër es 150 jaor aan steinkaolmienboew in 't landj. Bieje sloeting koom 'n ganse ceremonie, wobie de mienwirkers ouch 't litste stökske zwart góld euverhenjigdjen ane prizzendènt.
De sloeting vanne mien is e drek gevolg van 't feit det steinkaolwinning al veur jaore lang nimmieë rendabel is. De mien is al daen tied zwaor subsidieerdj wore. Det de miene neet rendabel mieë zeen haet al te make mitte hoeag köste vanne streng veiligheidsveursjrifter enne deepdje worop me mót grave. In Duutsjlandj ligke de kaole deper es 'ne kilomaeter, dewiel die in Australië bao aan 't oppervlaak ligke. Daoveur veurtj Duutsjlandj de kaole, die 't nuuedig haet veure innerzjiecentraals, noe in vanoet 't boetelandj.
De miene drogen inne jaore fieftig hieël väöl bie anen heropboew van Duutsjlandj nao d'n Twieëdje Werreldkrieg en vörmdje de gróndj van 't Wirtschafswunder. In die jaore wirkdje ruum e half miljoen luuj inne miene. Inne litste mien van Bottrop wirkdje nammeh 2600 luuj. De meiste woren al vervreug mit pensioen gegangen en die die al veur 25 jaor óngere gróndj höbbe gewirk guldj det zie mit häör fieftigste mit pensioen kónne. Veure res vanne luuj wuuertj e sociaal plan opgestèldj; det zal aevel 'n opgaaf waere, went de wirkloeasheid in 't Ruhrgebied ligk hieël hoeag.
Brónne
bewirk- De laatste steenkolenmijn van Duitsland sluit. nrc.nl, 20 dieëtsember 2018
- Einde van tijdperk: laatste steenkolenmijn Duitsland gaat dicht. NOS.nl, 21 dieëtsember 2018
- Letzte Zeche Deutschlands - Steinkohlebergwerk Prosper-Haniel schließt. ZDF, 20 dieëtsember 2018
Dit artikel besleit aad nuujs en maak deil oet van oos arsjief van nuujsberichte.