Poetin erkènt volksrippeblieke Donetsk en Loehansk

Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich


Kaertje vannen Donbass, de regio woe saer 't veurjaor van 2014 gevochte weurt tösje pro-Róssische separatiste en de Oekraïense armee
Dit artikel sjteit gesjreve in 't AGL.

De Róssische presidentj Poetin erkènt de ónaafhankelikheid vanne volksrippeblieke Donetsk en Loehansk. In 'n lang tillevisietoesjpraok, woevan 'n Ingelse transcriptie door 't Kremlin online woort gezat, haolde hae fel oet nao Oekraïne: det landj zouw genocide plege op de Rósse. Nao de toesjpraok teikende hae de documente veure erkènning.

De twie volksrippeblieke besjtaon oet deile van twie Oekraïense provincies. Róslandj wilt de Oekraïense soevereiniteit euver dees gróndgebede dus noe ouch officieel neet langer erkènne. Ze verklaorde zich in 2014 ónaafhankelik, mer dae sjtatus waar bis huuj door nog gein inkel landj erkènd. De bei separatistische regio's claime 't ganse gróndgebeed. 't Is daomit nog óndutelik welk gróndgebeed es volksrippebliek weurt erkènd.

De erkènning geit lienrech taege de Minsk-akkoorde oet 2014 en 2015. Dao-in woort aafgesjpraoke óm de twie regio's mie autonomie binne de Oekraïne te gaeve, inclusief de meugelikheid óm toetraejing toet de EU of de Navo taege te haje. Volges minister Lavrov höbbe de akkoorde geine zin mie, ómdet de Oekraïne die volges höm continu euvertraejt. Daomit riffereert hae dinkelik nao 't recente gewèldj in 't oeste van det landj, woe al saer 't besjtaon vanne volksrippeblieke weurt gevochte. De lètste jaore goof 't dökker e sjtaak-'t-vure, mer saer 't naojaor van 2021 is de situasie weer ónröstig. Boetedet loupe de sjpanninge ouch op door d'n troepenopboew ane grens mit Oekraïne. Ouch Wit-Róslandj deit mit mit 't mobilisere van militaire.

Inne nach van 21 op 22 fibberwarie 2022 reje de ierste tanks 't gebeed binne en die zouwe óngerdeil zien van 'n "vraejesmissie". Internasjonaal weurt de erkènning en 't binnevalle vanne regio sjerp veroerdeild.

Kiek ouch bewirk

Brónne bewirk



Dit artikel besleit aad nuujs en maak deil oet van oos arsjief van nuujsberichte.