RIVM: 234 nuuj sjtörfgevalle, waal minder besjmettinge

Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich


Dit artikel sjteit gesjreve in 't AGL.

De aafgeloupe 24 oer zien in Nederlandj 234 nuuj meldinge gedaon van luuj die zien gehiemeld door 't coronavirus. 't Totaal aantal gehiemelde patiënte kump daomèt op 2101. Det meldt 't RIVM innen dageliksen update. Volges 't RIVM ligke de aantalle op de gemiddelden dinsdig ömmer hoeg, ómdet väöl sjtörfgevalle oet 't weekend pas maondig weure gerapporteerd.

7427 coronapatiënte zien opgenome (gewees) in e krankehoes, 'n sjtieging van 292 persoene. Mèt 777 nuuj besjmettinge (lieger es gister, doe 952) kump 't totaal in Nederlandj noe op 19.580.

't Aantal van 234 sjtörfgevalle is 't hoegste aantal meldinge in 24 oer bis noe. De aafgeloupe daag noom det getal zjuus aaf: zaoterdig 164, zóndig 112, maondig 101. Wichtig óm daobie te vermelde is det 't geit óm meldinge; väöl persoene zien neet de aafgeloupe 24 oer, maar meistal al ierder gehiemeld.

Volges 't RIVM zien de meldinge op dinsdig consequent 't hoegste vanne week. Det is te verklaore doordet väöl vanne sjtörfgevalle en opnames op vriedig, zaoterdig en zóndig, pas op maondig administratief weure verwerk en gerapporteerd. Veurige week bieveurbeeld meldde 't RIVM op dinsdig 175 doeje dewiel 't oppe maondig nog 93 goof.

Elf sjlachoffers zien ónger de vieftig jaor aad. Ein persoen is jónger es dertig, maar d'n doed vanne 29-jäörige Guus oet 't Braobentse Baek en Dónk is nog neet verwerk gewaore in de nuujste sjtatistieke.

't Aantal meldinge van krankehoesopnaes noom de aafgeloupe week van aantalle van róndj de vief-, zèshónderd nao maondig 260. Mèt 292 inne aafgeloupe 24 oer blief dinsdig inne lien vanne aafgeloupe daag.

Ouch hie is 't aevel wichtig óm 't zègke det 't geit óm meldinge van luuj die in 't krankehoes ligke of loge. De werkeliken datum van 'n krankehoesopnaam kin al mierder daag geleje zien en toch pas noe gemeld. "Es v'r kieke nao 't totaal aantal krankehoesopnames dörf ich lankzaam te zègke det v'r ech euvere piek zien," zaet epidemioloog Susan van den Hof van 't RIVM. "In Noord-Braobant is det nog duteliker, maar in pervincies wie Noord- en Zuud-Hollandj, Gelderlandj, Limburg en Utrech noneet. 't Versjilt ech per regio."

Es alle gehiemelde weure verdeild euvere daag det zie ech gehiemeld zien, sjtorve de meiste luuj op 2 april. D'n daag vanne meiste krankehoesopnames is nog ömmer 24 miert. De sjtabilisering van veural 't aantal krankehoesopnames is daomèt sjteeds baeter te zeen. Sjtörfgevalle en krankehoesopnames die de kómmende daag weure gemeld, kinne de aantalle van dinsdig en de aafgeloupe daag nog doon sjtiege.


BrónneBewirk



Dit artikel besleit aad nuujs.