Saer oetbraak 330 coronadoeje in Limburgse zörgcentra
Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich
- Dit artikel sjteit gesjreve in 't AGL.
Saer 't begin vanne corona-oetbraak ind fibberwarie zien inne Limburgse verpleeghoezer 330 luuj door 't virus gehiemeld. Det bliek oet neet ierder gepubliceerde data van de Limburgse GGD's. 't Aantal van 330 kump baovenop de toet noe toe 542 sjtörfgevalle van Limburgers die nao 'nen tes mèt corona besjmet bleke.
In 'n euverzich van daag toet daag is good zichbaar det ind miert al sjpraoke waor van 'n piek qua coronasjtörfde in de verpleeg- en verzörgingshoezer. De 'sjtille ramp' woereuver de media later berichde, waor al ane gank. Sjterker nog, d'n ierste Limburgse coronadoeje waor te betreure op 4 miert in e zörgcentrum en neet, zoewie ieder gemeld, d'n andere daag in 't Zuyderlandkrankehoes in Haelder.
De nuuj GGD-ciefers bevestige 't beeld det 't virus väöl mier laeves eis es 't RIVM dageliks meldt. Det insjtituut beperk zich toet de sjtörfde van positief getesde luuj. De GGD-data zien pas later aangereik door hoesartse en specialiste ajeregenaeskónde in antwaord oppe vraog alert te zeen op sjtörfdes die hiel waarsjienlik te linke zien aan corona. Veurige week meldde 't Centraal Bureau van de Sjtatistiek det de sjtörfde in verpleeghoezer, GGZ-insjtellinge en gevangenisse inne ierste week van april waor verdöbbeld vergeleke mèt de gemiddelde sjtörfde in de ierste teen weke van 2020, wat veure epidemie is. Veur Limburg woorte doe 158 'verborge coronadoeje' geneumd, zónger oetsjplitsing nao insjtellinge. Veur 't iers gief 't noe gegaeves euvere ganse epidemie-periode. De totaal euversjtörfde, det beteikent 't aantal luuj det mier hiemelt es se normaal zouws verwachte, ligk in Limburg saer begin miert op doezend, aldusse CBS.
"Ózze optelsom van 872 kump dao kórtbie", zègk Christian Hoebe, huid infectiekrenkdes bieje GGD Zuud-Limburg. De gegaeves laote inmiddels in zoewel de krankehoezer es de zörgcentra 'n aafnaam zeen. Wieväöl luuj thoes sjterve, is noneet percies bekindj. 't Hoeg aantal 'verborge doeje' in tehoeze leidde tot väöl ophef euver 't gebrek aan móndjkepkes veur 't personeel. Volges Hoebe is dae sjtruim inmiddels good op gank gekómme en weure bewoeners ouch dökker getes, ierder gebeurde dit koum.
Brónne
bewirk- Naar verwachting 5 000 mensen overleden in tweede week april 2020. CBS, 17 april 2020
- Sinds uitbraak 330 coronadoden in Limburgse zorgcentra Serge Sekhuis - Dagblad De Limburger, 24 april 2020
Dit artikel besleit aad nuujs en maak deil oet van oos arsjief van nuujsberichte.