Taliban gaon boetewieke Kaboel binne, groete sjtad Jalalabad veroverd
De taliban zeen boetewieke vanne Afghaanse huidsjtad Kaboel binnegegange, meld 't Afghaanse ministerie van Binnelandse Zake. Vanmörge is de groete sjtad Jalalabad ouch in henj vanne terreurorganisasie gevalle.
- Dit artikel sjteit gesjreve in 't AGL.
De taliban rökde sjnel op nao Kaboel, woe ze inne boetewieke zeen gesignaleerd.
De jihadiste zegke in 'n verklaoring det ze alle sjtrieders höbbe opgedrage gei geweld te gebroeke en alle luuj die oet Kaboel wille vlöchte mótte laote gaon. Vrouwluuj woorte opgerope nao veilige plaatse te gaon.
Vanmörge haet de goevernäör vanne sjtad Jalalabad, in 't oeste van Afghanistan, zich euvergegaeve aan de taliban. Noe volges plaatselike autoriteite ouch Jalalabad zónger gevechte is veroverd, höbbe de moslimextremiste de waeg die 't landj mit Pakistan verbinje ouch ónger kontrol gekrege.
Gister woort de noordelike sjtad Mazar-i-Sharif al veroverd en raakde de regering de kontrol euver 't noorde van 't landj kwiet.
In 'n aantal waeke höbbe de taliban bekans gans Afghanistan ingenómme. De jihadiste rökke noe op nao de Afghaanse huidsjtad. Dao weurt momenteel 't Amerikaanse ambassadepersoneel geëvacueerd en ouch Duutsjland is det van plan.