Vleegmesjien verluus kórt nao opsjtiege vanaaf Baek motoróngerdeile, minstes twie gewónde
Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich
_-_panoramio.jpg)
- Dit artikel sjteit gesjreve in 't AGL.
E vrachvleegmesjien det vertrok vanaaf 't vleegveldj Mesjtreech-Aoke haet zaoterdigmiddig óngerdeile vanne motor verlore baoven 'n woenwiek in Meersje.
De Boeing 747 400 mit besjtemming New York koom in de probleme wie 'ne brandj oetbrook in eine vanne veer motore, aldusse 'ne waordveurder vanne Veiligheidsregio. Inne ómgaeving van Meersje zien versjillende broksjtökke terechgekome. Minstes twie luuj raakde daobie gewóndj. E kindj leep brandjwónde op bie 't oppakke van zo'n óngerdeil. 'n Ajer vrouw raakde leechgewóndj wie ze woort geraak door e broksjtök. Mierder auto's en hoezer zien besjadig geraak en sjtraote woorte aafgezat. "Väöl luuj zien gesjrokke in Meersje, ómdet ze 't vleegmesjien mit branjende motor zoge euvervlege," aldusse 'ne waordveurder vanne brandjwaer.
De politie vreug mit klem vanne broksjtökke aaf te blieve. Dit in verbandj mit de opnaam vanne sjaaj. De brandjwaer zaet zich te besjeftige mit 't verzamele daovan. 't Geit veural óm väöl klein óngerdeile. Luuj die e broksjtök höbbe gevónje, woorte gevraag of ze contak kènne opnumme mit +31 43 808 00 06. De sjaaj kèn ouch weure gemèld bieje verziekering.
't Vleegmesjien kós op drie motore doorvlege nao Luuk en is dao veilig gelandj. Gekaoze woort veur Luuk, ómdat 't dao 'n langer landingsbaan gief, zaet 'ne waordveurder vanne Veiligheidsregio. De oerzaak van 't óngelök is ónbekindj. 'n Waordveurster vanne lóchhave in Baek sjleet neet oet det 'ne motor meugelik get haet gezoek waodoor de turbineblaar kepotgónge. Zoe zeen de broksjtökke volges häör waal oet. Maar mit zekerheid kós ze det neet zègke.
De lóchverkiersleijing Nederlandj zaet dat ze gein infermasie haet euver 't incident. De Belsje lóchverkiersleijing, Skeyes, haet 't vleegmesjien begeleid, leet 'ne waordveurder weite. 't Geit volges 'm óm e toesjtel vanne Britse maotsjappie Longtail Aviation. Op Flightrader waor te zeen det 't vleegmesjien inkel rundjes baove de Belsje Ardenne en Zuud-Limburg haet gevloge veurdet 't óm 17.11 landde oppe lóchhave van Luuk, ein oer nao de sjtart.
Brónne bewirk
Dit artikel besleit aad nuujs en maak deil oet van oos arsjief van nuujsberichte.