Oekraïne: doorbraak Róssische frontlinies Cherson
De Oekraïense armee is e langverwach taegenoffensief begós in deile vanne regio Mykolaiv en inne zudelike regio Cherson. Det deil vanne Oekraïne weurt saert miert 2022 bezat door Róssische troepe en 't wichtigste doel is de inname vanne gelieknamige havesjtad Cherson. Oekraïne sjprik van 'nen doorbraak vanne Róssische frontlinies, dewiel Róslandj bewaert det 't d'n aanval haet aafgesjlage en de Oekraïense troepe daobie zjwaor verleze höbbe geleje. De bewaeringe zint neet ónaafhenkelik te verifiëre.
- Dit artikel is gesjreve in 't AGL.
Aan 't begin vanne invasie woort dit gebeed rilletief sjnel ingenómme door Róssische troepe, die de regio vanoet de Krim aanvele. Bieje mónjing vannen Dnjepr hauverwaeges Cherson enne havesjtad Mykolaiv kóste de Oekraïense troepe de Rósse in miert dit jaor taegehaje, woenao 't front maondelank min of mie sjtabiel bleef en de Oekraieners soms zelfs in 't veurdeil waore. Ze höbbe in daen tied al get dörpkes en tactische posities weite te herovere, dewiel de Róssische troepe zich mie en mie ginge concentrere op d'n Donbass.
't Taegenoffensief in 't zuje sjtóng al langer oppe agenda, mer is dinkelik e realistischer doel gewaore door de lievering van e geavanceerd Amerikaans raketsysteem (M142-HIMARS) in juli dit jaor en 't feit det de Rósse in dees contreie dudelik in 't defensief zint geraak door de campagne in 't oeste. Euveriges is dit neet d'n ierste kier det de Oekraïense sjtriedkrachte e offensief aankóndige. Det dege ze ouch al in juli dit jaor, mer veur zoewied bekindj woort toch gein groete terreinwins gebook oppe Rósse en sjproke militair analyste zelfs van 'n patsjtelling aan 't front. Ouch gief 't twiefels euver de dinkelikheid van zó'n groet Oekraïens offensief. Westerse, mer ouch Oekraïense experts, gaon daovan oet det me de Róssische sjtriedkrachte in ierste instantie wilt verzjwakke en in reaksie dao-op verplaatse de Rósse väöl troepe nao 't zuje.
Det zuut me beveurbeeld truuk aan 't feit det de Oekraïners door de HIMARS-systeme baeter in sjtaat zint óm Róssische doele wied achter 't front, dus deper inne regio Cherson en zelfs oppe Krim, te besjtoke. Versjeie munitiedepots en anger doele zint es gevolg van die campagne verinneweerd gewaore. Boetedet zint twie sjtrategische brögke euver d'n Dnjepr es gevolg van Oekraïense besjetinge ónbroekbaar veure verplaatsing van zjwaor matterjeel. Daodoor zint de Róssische troepe ten weste vanne reveer en inne sjtad Cherson aafgesjneje van anger bezatde gebeje, wat de ómsingeling van Róssische troepe inne sjtad Cherson meugelik maak.
Kiek ouch
bewirkBrónne
bewirk- 200 Kilometer von der Front entfernt | Angriff auf russische Luftwaffenbasis - Video zeigt Explosion. Redaksie Focus - zónger datum
- Kherson: Ukraine claims new push in Russian-held region. Leo Sands & Yaroslav Lukov - BBC, 30 augustus 2022
- TERUGLEZEN | Russisch leger: ‘zware verliezen’ toegebracht aan Oekraïense strijdkrachten rond Cherson en Mikolajiv. Redaksie De Limburger - 29 augustus 2022
- Ukraine’s Battle for Kherson Could Be a Key Victory | Zelensky has pledged to liberate occupied territory. Doug Klain - FP, 2 augustus 2022
- Ukrainian adviser warns progress will be slow as southern counterattack begins. Isobel Kosjiv, The Guardian - 30 augustus 2022
- Ukrainian Southern Counteroffensive ‘Unlikely’ as Russia Bolsters Forces. James Beardsworth, The Moscow Times - 18 augustus 2022