Róslandj book veuroetgank in d'n Donbass, mie hölp veur de Oekraïne
Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich
- Dit artikel is gesjreve in 't AGL.
1 juni 2022 - Bie gevechte in d'n Donbass probere Róssische troepe en separatistische milities de sjtad Severodonetsk te ómsingele. De poging veur de Oekraïense linies te doorbreke kump bekans twie waeke nao de val vanne havesjtad Marioepol, woe de Rósse euveriges te make krege mit fellen taegesjtandj van 't Oekraïens-nasjonalistische Azovbataljon. Op dit moment rökke de troepe op nao Severodonetsk, wat ze besjtoke mit artillerie en inmiddels ouch mitten gróndj is geliek gemaak gewaore. Volges prizzedent Zelensky valle daobie ederen daag teentalle doeje anen Oekraïense kantj en verwach weurt det ouch de Rósse zjwaor verleze te lieje höbbe. Wienie 't de Róssische armee lök die sjtad te verovere, höbbe ze praktisch d'n gansen oblas Loehansk in henj.
Ouch op anger plaatse weurt gevochte, woe-ónger inne zujelike oblaste Cherson en Zaporizja, die al groetedeils in henj zin vanne Rósse. Dao boke de Oekraïnse troepe get mie sukses en blief 't front min of mie sjtabiel.
Prizzedent Zelensky nump de situatie "meujlik" en haet ónger anger de VS veur hölp gevraog. Prizzedent Biden haet belaof de Oekraïne te veurzeen van geavanceerde raketsysteme. Aafgeloupe maondig twiefelde de Amerikaanse regering nog, ómdet de raketsysteme ouch doele in Róslandj kinne rake, wat tot escalatie van 't conflik kint leije. Veur det scenario te veurkómme levere de Amerikane munitie mit e bereik van maximaal 80 killemaeter. Daomit kinne de Oekraïense troepe bieveurbeeld Róssische artillerie oetsjakele, die dök gebroek weurt bie zjwaor bombardemente op sjtaej en civiel doele.
Ouch Pruses is van plan veur de Oekraïense armee te hellepe door e modern lóchaafwaersysteem te levere wat artillerie op groeten aafsjtandj kint detektere.
Kiek ouch bewirk
Brónne bewirk
- NOS Teleteks, NOS 125, 128 & 129
Dit artikel besleit aad nuujs en maak deil oet van oos arsjief van nuujsberichte.